Donostiako Udaleko Euskara Zerbitzuak urteak daramatza euskararen erabilera sustatu nahian hiriko ostalaritzan eta merkataritzan “Merkataritza eta Ostalaritzan ere euskaraz” egitasmoaren bitartez. Egitasmo honen baitan, beste urrats bat eman du eta “Erraza da” proiektu pilotua aurkeztu du.

“Erraza da” proiektua abian jarriko da Parte Zaharreko jatetxetan eta tabernetan martxoaren bukaeran eta euskara ez dakiten zerbitzariei eta langileei zuzenduta egongo da. Ostalaritzan lanean ari diren langile askok ez dakite euskaraz hitz egiten eta ez dira euskaltegira joaten. Egoera horri aurre egiteko Udaleko Euskara Zerbitzuak “Erraza da” ekimena, erraza eta jostagarria dena, abian jarriko du. Egunean bi hitz/esamolde ikastea da proiektuaren muina eta, horrela, hiru hilabetetan 200 hitz / esamolde ikasita, gutxieneko ulermena izateko gaitasuna izango dute.

Bezeroen eta langileen arteko lehen hitzak zerikusi handia du hizkuntza hautuan. Horregatik, hain garrantzitsua da bezeroa agurtzea Kaixo! esanez edo Zer hartu nahi duzu? galdetuz, hasierako agur horrek euskararen erabilera ikaragarri errazten du eta.

Eneko Goia alkateak adierazi du izenburuak berak definitzen duela proiektua: “Erraza da, baina, era berean, eraginkorra izatea nahi dugu. Erraza da egunean bi hitz euskaraz ikastea eta, ahalegin handiegirik gabe, hiru hilabeteko epean zerbitzariak lortuko du ulertzea bezeroak eskatzen duena eta gai izango da elkarrizketa sinple bat euskaraz egiteko”.

Parte Zaharreko taberna guztiak bisitatuko dira

Datorren astean hasiko dira Parte Zaharreko tabernak eta jatetxeak bisitatzen. Erronkan parte hartu nahi duen establezimenduak izena eman beharko du eta gauza bera egin beharko dute proiektuan parte hartuko duten zerbitzariek.

Behin izena emanda, parte hartzaileek hitz guztiak biltzen dituen euskarria jasoko dute eta apirilaren 23an hasiko dira denak batera hitzak ikasten. Hamabostean behin, ikasitakoari buruzko galdera sorta motz bati erantzun beharko diote.

Egitasmoan parte hartuko duten langileei “Ikasten ari naiz” esaldia duen txapa eramateko aukera emango zaie. Horrela, bezero euskaldunak jakin ahal izango du zerbitzaria euskara ikasteko ahalegina egiten ari dela.

“Erraza da” proiektuan parte hartuko duen establezimenduak egutegi bat jasoko du, non egunean hiztegiko hitz bat jasoko den. Egutegi hori leku ikusgarrian jartzeko eskaera egingo zaie arduradunei, bereziki euskara ez dakiten bezeroek ikusi eta ikasi dezaten.

Proiektuari buruzko informazioa, jarraibideak, hitz guztien zerrenda eta abar www.errazada.eus webgunean izango dituzte eta “Erraza da” egitasmoa bukatzen duten guztiek agiri bat jasoko dute.

Gipuzkoako Ostalaritza Elkartearekin eta Ilazki eta Legazpi6 euskaltegiekin elkarlanean

Gipuzkoako Ostalaritza Elkarteak begi onez ikusi du egitasmoa, euskara ez dakiten langile asko ari baitira lanean sektore horretan. Hori dela eta, ostalaritzako profesionalak egitasmo pilotu honetan parte hartzera animatu nahi ditu.

Era berean, Parte Zaharreko Ilazki eta Legazpi 6 euskaltegiak unitate didaktiko berria prestatzen aritu dira, Euskara Zerbitzuarekin elkarlanean. Bi euskaltegi horietako ordezkariak baikor ageri dira proiektuarekin, “orain arte euskaltegira etorri ez diren langile horiek euskarara hurbiltzeko balioko baitu. Zerbait erraza eta eraginkorra egiten saiatu gara”.